५०% कमिशन: काँग्रेसचं ‘पे ट्रिपल इंजिन’ अभियान; QR कोड स्कॅन करताच ६ सवाल, पाचवा लक्षवेधी

मुंबई: विधानसभा निवडणुकीची रणधुमाळी सुरु झाली आहे. लोकसभा निवडणुकीत सुसाट कामगिरी करणाऱ्या महाविकास आघाडीतील काँग्रेसनं सत्ताधारी महायुतीविरोधात ‘पे ट्रिपल इंजिन’ अभियान सुरु केलं आहे. राज्यातील सरकारी कामांमध्ये ट्रिपल इंजिन सरकार ५० टक्के कमिशन घेत असल्याचा गंभीर आरोप काँग्रेसकडून करण्यात आला आहे.

‘पे ट्रिपल इंजिन’ अभियानासाठी काँग्रेसनं एक स्कॅन कोड तयार केला आहे. त्यावर मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवारांचे फोटो आहेत. याआधी काँग्रेसनं याच पद्धतीनं एप्रिल-मे २०२३ मध्ये कर्नाटकचे तत्कालीन मुख्यमंत्री बसवराज बोम्मई यांच्याविरोधात रान उठवलं होतं. काँग्रेसनं बोम्मई यांचा फोटो स्कॅन कोडवर छापून ‘पेसीएम’ अभियान राबवलं होतं. या प्रचाराचा फायदा काँग्रेसला झाला. कर्नाटकात काँग्रेसनं दणदणीत विजय मिळवला.

आता काँग्रेसनं राज्यातील महायुतीविरोधात ‘पे ट्रिपल इंजिन’ अभियानास प्रारंभ केला आहे. काँग्रेसचे महाराष्ट्र राज्य प्रभारी रमेश चेन्नीथला, प्रदेशाध्यक्ष नाना पटोले, विधानसभेतील विरोधी पक्षनेते विजय वडेट्टीवार, विधानसभेतील गटनेते बाळासाहेब थोरात यांच्या उपस्थितीत ‘पे ट्रिपल इंजिन’ अभियानाची सुरुवात करण्यात आली. काँग्रेसनं तयार केलेल्या स्कॅन कोडच्या वर ५० टक्के कमिशन स्वीकारण्यात येईल, असा उल्लेख आहे.

मुख्यमंत्री आणि दोन उपमुख्यमंत्र्यांचे फोटो असलेला क्यूआर कोड स्कॅन केल्यावर सहा प्रश्न दिसतात. हे प्रश्न महायुती सरकारच्या कारभारासंबंधित आहेत. यातील पाच प्रश्नांना हो, नाही किंवा अन्य असे तीन पर्याय आहेत.
VIDEO: मुख्यमंत्र्यांनी दोरी खेचली, पण झेंडा फडकेना; बराच वेळ प्रयत्न करुनही जमेना, अखेर…
कोड स्कॅन केल्यानंतर दिसणारे प्रश्न-
१. ५० टक्के कमिशनवाले खोके सरकार कमिशनमधून आलेला पैसा आमदारांचा घोडेबाजार करण्यासाठी वापरते. या मताशी तुम्ही सहमत आहात का?
हो
नाही
अन्य

२. महाराष्ट्रात मोठे मोठे उद्योग आले असता, त्या उद्योगांना हे सरकार गुजरातला पाठवते. आपण सहमत आहात का?
हो
नाही
अन्य

३. ५० टक्के कमिशनवाल्या खोके सरकारवर ४१ महामंडळांचा संचित तोटा ५१००० कोटींवर गेला आहे, या मताशी तुम्ही सहमत आहात का?
हो
नाही
अन्य

४. ५० टक्के कमिशनवाले खोके सरकार जनतेपेक्षा कंत्राटदारांचाच जास्त विचार करते, या मताशी तुम्ही सहमत आहात का?
हो
नाही
अन्य

५. ”कमिशन द्या, टेंडर घ्या” या संकल्पनेचे जनक कोण?
एकनाथ शिंदे
देवेंद्र फडणवीस
अजित पवार
वरीलपैकी सर्व
अन्य

६. कोणताही मोठा उद्योग जेणेकरुन तरुणांना मोठ्या संख्येत रोजगार मिळेल, असा उद्योग महाराष्ट्रात आणला का?
हो
नाही
अन्य