Tej Police Times
संदीप देशपांडे समोर, ठाकरेंच्या वरळी गटप्रमुखाने हातातलं शिवबंधन सोडलं, थेट मनसेत प्रवेश
मुंबई : उद्धव ठाकरे यांच्या नेतृत्वातील शिवसेनेचे गटप्रमुख निलेश ठोंबरे यांनी पक्षाला ‘जय महाराष्ट्र’ केला. ठोंबरेंनी महाराष्ट्र नवनिर्माण सेनेत प्रवेश केला. विशेष म्हणजे मनसे सरचिटणीस संदीप देशपांडे यांची भेट घेताक्षणी ठोंबरेंनी सर्वांना अवाक करणारं कृत्य केलं. संदीप देशपांडेंच्या समोर निलेश ठोबरे यांनी आपल्या हातातलं शिवबंधन काढून टाकलं. लागलीच उद्धव ठाकरेंच्या पक्षाला रामराम ठोकून राज ठाकरेंच्या महाराष्ट्र नवनिर्माण सेनेचा झेंडा हाती घेतला.
उद्धव ठाकरेंच्या शिवसेनेच्या वरळीतील गटप्रमुखाने मनसेत प्रवेश केला आहे. मनसे नेते संदीप देशपांडे यांच्यासमोर निलेश ठोंबरे यांनी शिवबंधन सोडलं. यानंतर निलेश ठोंबरे यांनी मनसेमध्ये प्रवेश केला आहे. संदीप देशपांडे वरळी विधानसभेतील नागरिकांच्या समस्या संदीप देशपांडे जाणून घेत आहेत. यावेळी हा प्रकार घडला.
संदीप देशपांडे हे वरळी मतदारसंघातून विधानसभा निवडणूक लढवणार असल्याचं निश्चित मानलं जात आहे. त्यामुळे मनसेचे संदीप देशपांडे विरुद्ध शिवसेना (उद्धव बाळासाहेब ठाकरे) पक्षाचे नेते आणि माजी मंत्री आदित्य ठाकरे अशी लढत वरळीत पाहायला मिळण्याची शक्यता आहे. या पार्श्वभूमीवर संदीप देशपांडे यांनी मोर्चेबांधणीला सुरुवात केली आहे.
वरळीत राजकीय भेटीगाठींचा सिलसिला सुरु असताना ठाकरेंचे गटप्रमुख निलेश ठोंबरे यांच्याशी संदीप देशपांडे यांची भेट झाली. यावेळी ठोंबरेंनी त्यांच्या देखतच आपल्या हातातलं शिवबंधन तोडलं आणि तत्क्षणी मनसेमध्ये पक्ष प्रवेश केला. ठोंबरेंनी देशपांडे कडकडून मिठीही मारली.
Nawab Malik : नवाब मलिक यांनी झाकलेलं ‘घड्याळ’ बाहेर काढलं, अखेर भूमिका उघड, फडणवीसांना सहभाग मान्य?
दरम्यान ठाकरे गट आणि मनसे यांच्यातील संघर्ष पेटला आहे. ठाकरे गटाच्या शिवसैनिकांनी मनसे अध्यक्ष राज ठाकरे मराठवाडा दौऱ्यावर असताना छत्रपती संभाजीनगर येथे त्यांच्या ताफ्यासमोर सुपाऱ्या टाकल्या होत्या. संजय राऊत यांनी या प्रकाराचं समर्थन करत नसल्याचं सांगताना ते शिवसैनिक असल्याची कबुली दिली होती.
त्यानंतर उद्धव ठाकरे ठाण्यात मेळाव्यासाठी जात असताना त्यांच्या गाडीवर मनसे कार्यकर्त्यांनी शेण आणि बांगड्या फेकत सूड उगवण्याचा प्रयत्न केला होता. ठाकरेंचे शिवसैनिक आणि मनसैनिक भिडल्याने काही काळ तणावाचं वातावरण होतं.