दहिसर ते भाईंदर मेट्रो लवकरच सुरू होणार, ८७ टक्के काम पूर्ण; कसा असेल मार्ग?

मिरा-भाईंदर : पश्चिम उपनगरात लवकरच मेट्रो सुरू होऊन प्रवाशांना याचा मोठा फायदा होणार असून वेळेचीही काही प्रमाणात बचत करण्यास मदत होणार आहे. दहिसर चेकनाका ते सुभाषचंद्र बोस मैदानापर्यंत मेट्रो-९ ची सेवा लवकरच सुरू होणार आहे. सध्या मेट्रो-९ चं ८७ टक्के काम पूर्ण झालं असल्याची माहिती एमएमआरडीएने दिली आहे. २०२९ मध्ये या मेट्रो-९ साठी टेंडर जारी करण्यात आलं होतं. त्यानंतर २०२२ पर्यंत हा मेट्रो मार्ग सुरू करण्यात येणाचं सांगण्यात आलं होतं. मात्र हे काम करोनाचा काळ तसंच काही कारणांमुळे रखडलं. त्यानंतर आता दहिसर चेकनाका ते सुभाषचंद्र बोस मैदानापर्यंत मेट्रो-९ मार्ग डिसेंबर २०२५ पर्यंत सुरू होणार असल्याची माहिती आहे.

कसा असेल मार्ग?

दहिसर ते भाईंदर पश्चिमपर्यंत मिरा-भाईंदर मेट्रो मार्ग १०.४१ किमीपर्यंत असणार आहे. या मार्गावर ८ स्टेशन असणार आहेत. हा मेट्रो मार्ग पूर्णपणे एलिवेटेड असणार आहे. सतत वाढणारी लोकसंख्या आणि वाहतुककोंडी या पार्श्वभूमीवर मेट्रोखाली हाटकॅश ते गोल्डन नेस्ट सर्कलपर्यंत तीन फ्लायओव्हर तयार करण्यात येणार आहेत. यापैकी हाटकॅश ते साई बाबा नगरपर्यंतचा फ्लायओव्हर तयार झाला आहे.
Vasai News : वसई-विरारमध्ये उभारले जाणार ४ ओव्हरब्रिज, वाहतूककोंडी सुटणार; कुठून कसा असेल मार्ग?

कोणत्या ८ स्थानकांवर असणार थांबा?

– दहिसर
– पांडुरंगवाडी
– मीरा-गांव
– काशिगांव
– साईबाबा नगर
– मेडतिया नगर
– शहीद भगत सिंह उद्यान (भाईंदर पश्चिम)
– सुभाषचंद्र बोस मैदान (भाईंदर पश्चिम)
Ghodbunder To Bhayandar Elevated Road : घोडबंदर ते भाईंदरपर्यंतची वाहतूक कोंडी सुटणार; एलिवेटेड रोड सुरू होणार? कसा असेल मार्ग?

दोन भागात सुरू होणार मेट्रो

एमएमआरडीएकडून मेट्रो-९ दोन टप्प्यांत सुरू करण्यात येणार आहे. पहिल्या टप्प्यात डिसेंबर २०२४ पर्यंत दहिसर ते काशिगांवपर्यंत मेट्रो सुरू होईल, तर डिसेंबर २०२५ पर्यंत काशिगांव ते सुभाषचंद्र बोस मैदान अर्थात भाईंदर पश्चिमपर्यंत सुरू होणार आहे.

भाईंदरपासून पुढेही जाणार मेट्रो

मेट्रो-९ या कारशेडचं काम राई गावात सुरू होणार होतं, मात्र स्थानिक लोकांच्या विरोधामुळे ही कारशेड उत्तन डोंगरीमध्ये स्थलांतरित करण्यात आली. आता मेट्रो-९ सुभाषचंद्र बोस मैदान ते डोंगरी अशा मार्गावर धावेल. मूर्धा, राई, मोरवा गावातही मेट्रो मिळेल. ही योजना अद्याप केवळ कागदावर असून यासाठी मेट्रोच्या तिसऱ्या टप्प्याची वाट पाहावी लागणार आहे.