Tej Police Times
बदलापूर, पुण्यानंतर लातुरमध्ये साडेचार वर्षांच्या चिमुकलीवर लैंगिक अत्याचार, आरोपी अटकेत
ऋषिकेश होळीकर, लातूर : कोलकातामध्ये डॉक्टर तरुणीवर लैंगिक अत्याचारानंतर तिची हत्या करण्यात आली. हे प्रकरण ताज असताना ठाणे जिल्ह्यातील बदलापूर शहरात अवघ्या चार वर्षांच्या चिमुकलीवर अत्याचार करण्यात आला. या घटनेनंतर बदलापुरमध्ये लोकांनी रस्त्यावर उतरत तीव्र आंदोलन केलं. हे आंदोलन निवळत नाही, तोपर्यंत लातुरमधून धक्कादायक घटना समोर आली आहे. साडेचार वर्षांच्या मुलीवर लैंगिक अत्याचाराची घटना लातुरमध्ये उघडकीस आली आहे. बदलापूर, पुण्यानंतर आता पाठोपाठ लातूर इथे हा संतापजनक प्रकार समोर आला आहे.
बदलापूर, पुण्यानंतर लातुरमध्ये संतापजनक घटना
राज्यातील बदलापूर आणि पुणे इथे अल्पवयीन मुलींवर अत्याचाराची घटना ताजी असताना लातूर जिल्ह्यातील चाकूर पोलीस ठाण्याअंतर्गत एका साडेचार वर्षीय अल्पवयीन चिमुकलीवर अत्याचार झाल्याची घटना समोर आली आहे. लातूर जिल्ह्यातील चाकूर पोलीस ठाण्याच्या हद्दीतील एका गावात साडेचार वर्षाच्या चिमुकल्या मुलीवर लैंगिक अत्याचार करण्यात आला.
चाकूर पोलीस ठाण्याच्या हद्दीतील एका गावात १९ वर्षी आरोपीच्या घरासमोर चार वर्ष दहा महिन्याची मुलगी राहत होती. १७ ऑगस्ट रोजी आरोपीने मुलीवर लैंगिक अत्याचार केले होते. याची माहिती मुलीने आईला दिल्यानंतर त्या दोन कुटुंबात तुफान हाणामारी झाली. प्रकरण चाकूर पोलीस ठाण्यात दाखल झालं. चाकूर पोलीस ठाण्यात पोक्सो अंतर्गत गुन्हा दाखल करण्यात आला आहे. आरोपीस तात्काळ अटक करण्यात आली आहे. पुढील तपास पोलीस करत आहे.
Who is Akshay Shinde : कोण आहे अक्षय शिंदे, ज्या नराधमाने बदलापुरात चिमुकल्यांसोबत केलं दृष्कृत्य
दरम्यान, कोलकाता डॉक्टर तरुणीवरील अत्याचार आणि हत्येचं प्रकरण असतानाच बदलापुरमध्ये दोन चिमुकल्यांवर लैंगिक अत्याचाराची घटना समोर आली. १३ ऑगस्ट रोजी घटना समोर आल्यानंतरही या प्रकरणाची कोणतीही दखल घेतली जात नव्हती. अखेर बदलापुरकरांनी आक्रमक होत रस्त्यावर उतरत आंदोलन केलं. इतकंच नाही तर त्यांनी रेलरोको करत तब्बल १० तास रेल्वे सेवा ठप्प केली होती. नागरिकांच्या संतापाच्या उद्रेक झाल्यानंतर प्रशासनाने कारवाईचे आदेश दिले.
हे आंदोलन शांत होत नाही तोपर्यंत पुण्यात एका १९ वर्षीय तरुणाने सातवीत शिकणाऱ्या विद्यार्थीनीवर अत्याचार केल्याची धक्कादायक घटना समोर आली. याप्रकरणी आरोपीला अटक करण्यात आली आहे. त्यानंतर लातुरमध्येही घडलेल्या या घटनेनंतर राज्यात एकच संताप व्यक्त केला जात आहे.