नागपूर विद्यापीठातील महिला रोखपालाचा ‘प्रताप’, ४४ लाखांचा लावला चुना, ‘त्या’ पावतीमुळे भ्रष्टाचार उघड

एम. के. बिल्डरने विद्यापीठाच्या अभियंता विभागामार्फत ३४ हजार १६० रुपयांची पावती सुरक्षा ठेवीच्या रिफंडसाठी जमा केली होती. वित्त विभागातील कर्मचाऱ्यांनी तपासणी केली असता मूळ पावती केवळ ४ हजार १६० रुपयांची होती. त्यात बबिता मसरामच्या लॉगिन आयडीवरून २०२२मध्येच मॉडिफिकेशन झाले होते. याबाबत विद्यापीठाचे वित्त व लेखा अधिकारी हरीश पालीवाल यांनी मसरामला विचारणा केली असता तिने चुकीने मॉडिफिकेशन झाल्याचा दावा केला व ३० हजार रुपये विद्यापीठाच्या खात्यात भरले. मात्र, पालीवाल यांना संशय आल्याने त्यांनी तिच्या युझर आयडीवरून दिलेल्या पावत्यांची तपासणी केली. त्यात तिने ४३९ पावत्या मॉडिफाय करत विद्यापीठाला तब्बल ४४ लाख ४० हजारांचा गंडा घातल्याची बाब समोर आली. विद्यापीठाने आणखी चौकशी केल्यानंतर पालीवाल यांच्या तक्रारीवरून मसरामविरोधात अंबाझरी पोलीस ठाण्यात फसवणुकीचा गुन्हा दाखल करण्यात आला आहे.
Nagpur Crime: कारवाईसाठी आलेल्या पोलिसाच्या अंगावर सोडला कुत्रा; नागपुरात हेडकॉन्स्टेबल जखमी, बाप-लेकाविरुद्ध गुन्हा

गुन्ह्यासाठी सॉफ्टवेअरचा वापर

विद्यापीठात कॅश काऊंटरवरील रोखपाल एका सॉफ्टवेअरच्या माध्यमातून काम करतात. त्यांना युझर आयडी व पासवर्डदेखील देण्यात आला आहे. पैसे जमा केल्याची एखादी नोंद चुकली तर त्याच दिवशी त्यात बदल करण्याचे अधिकार रोखपालांना देण्यात आले आहेत. चूक नंतर समोर आली तर अधिकारी पावती मॉडिफाय करू शकतात. मसराम हिने याच पावत्या मॉडिफाय करून विद्यापीठाला गंडा घातल्याचे स्पष्ट झाले आहे.