५ वर्षांत दुप्पट झाली संपत्ती; सोनं, चांदी, वाहनांचा समावेश; धनंजय मुंडेंची मालमत्ता किती?

कृषिमंत्री धनंजय मुंडेंनी उमेदवारी अर्ज दाखल करताना त्यांच्या संपत्तीची माहिती दिली. त्यातून त्यांच्या संपत्तीचा नेमका आकडा समोर आला आहे. धनंजय मुंडेंकडे ५३.८० कोटी रुपयांची संपत्ती आहे. गेल्या ५ वर्षांत त्यांची संपत्ती दुपटीनं वाढली आहे. पाच वर्षांपूर्वी मुंडेंनी परळीतूनच विधानसभा लढवली होती. तेव्हा त्यांनी भाजपच्या पंकजा मुंडे यांचा पराभव केला होता. त्यानंतर मुंडे भाजपमध्ये साईडलाईन झाल्या.
Maharashtra Election 2024: काळाचा असाही महिमा! भाजपच्या दिग्गज नेत्याच्या मतदारसंघातून ४० वर्षांनंतर कमळ गायब
उमेदवारी अर्ज भरताना धनंजय मुंडे यांनी शपथपत्र सादर केलं. त्यात त्यांच्या मालमत्तेचा तपशील आहे. २०१९ मध्ये मुंडे यांची संपत्ती २३ कोटी रुपयांच्या घरात होती. आता त्यात दुपटीपेक्षा जास्त वाढ झाली आहे. शपथपत्रात मुंडे यांनी ५३.८० कोटी रुपयांचा आकडा नमूद केला आहे.
मागील ५ वर्षांत मुंडे यांच्या संपत्तीत जवळपास ३१ कोटी रुपयांची वाढ झाली आहे. मुंडे यांच्या कुटुंबाकडे ५३ कोटी ८० लाख रुपयांची संपत्ती आहे. त्यांच्याकडे १५ कोटींची वाहनं आहेत. त्यात टँकरपासून बुलेटपर्यंतच्या ७ वाहनांचा समावेश आहे. मुंडे यांच्याकडे दीड किलो चांदी आहे. कृषी मंत्र्यांकडे ७ लाख ३ हजार रुपयांचं १९० ग्रॅम सोनं आहे.

धनंजय मुंडे उपमुख्यमंत्री अजित पवारांच्या विश्वासातील नेते समजले जातात. २०१४ मध्ये भाजपच्या नेत्या पंकजा मुंडे यांनी त्यांचा विधानसभेला पराभव केला. २०१९ मध्ये धनंजय मुंडे यांनी पराभवाची सव्याज परतफेड केली. विधानसभा निवडणुकीनंतर महाविकास आघाडी सरकार स्थापनेच्या हालचाली सुरु असताना अजित पवारांनी पहाटेच्या सुमारास देवेंद्र फडणवीस यांच्यासोबत राजभवन गाठत उपमुख्यमंत्रिपदाची शपथ घेतली. त्यावेळी त्यांच्या सोबत काही आमदार असल्याचा दावा करण्यात आला. या सगळ्या घडामोडी सुरु असताना मुंडे नॉट रिचेबल होते. अजित पवार २०२३ मध्ये महायुतीत जाताच त्यांनी मुंडे यांच्या कृषी मंत्रिपद दिलं.