मुंबईकरांनो, दिवाळीत फटाके फोडण्यास परवानगी, पण…; BMCकडून वेळ पाळण्याचे आवाहन

दिवाळीत मोठ्या प्रमाणात फटाके फोडण्यात येतात. त्यामुळे ध्वनिप्रदूषणाबरोबरच वायुप्रदूषणही होते. प्रदूषण नियंत्रणासाठी मुंबई महापालिकेने यावेळी मार्गदर्शक तत्त्वे जारी केली आहेत. फटाक्यांच्या प्रदूषित हवेमुळे लहान मुले, गर्भवती महिला, वृद्ध व्यक्ती, दम्यासारख्या आजाराचे रुग्ण अशा सर्वांनाच त्रास होतो. त्यासोबतच पर्यावरणाचेही नुकसान होते. त्यामुळे प्रदूषण होऊ नये, याकडे विशेष लक्ष द्यावे, असे आवाहन महापालिकेने केले आहे.

फटाके वाजवताना काळजी घ्या
– ध्वनी व वायुप्रदूषण टाळावे
– ध्वनिविरहित फटाक्यांचा वापर करण्यास प्राधान्य द्यावे
– कमीत कमी वायुप्रदूषण करणारे फटाके फोडावेत
– ज्येष्ठ नागरिक आणि हृदयरुग्णांप्रती जबाबदारी जाणून तीव्र आवाजाचे फटाके फोडणे टाळावे
– फटाके फोडताना शक्यतो सुती कपडे परिधान करावेत. सैल कपडे वापरू नयेत
– फटाके मोकळ्या जागी फोडावेत
– फटाके फोडताना सुरक्षेचा भाग म्हणून पाण्याने भरलेली बादली, वाळू इत्यादी बाबी जवळ बाळगाव्यात.
– फटाके फोडताना वाळलेली पाने, कागद किंवा कोणतीही इतर सामग्री जाळू नये.
– फटाके फोडताना फुलबाजी किंवा अगरबत्तीचा वापर करा

हे करू नये
– इमारतीच्या आत व जिन्यावर फटाके फोडू नयेत.
– फटाके पेटवण्यासाठी आगकाडी अथवा लायटरचा वापर टाळावा
– झाडे, ओव्हरहेड विद्युत तार किंवा उंच इमारतीजवळ हवेत उडणारे फटाके फोडू नये.
– खिडक्यांच्या पडद्याजवळ पणत्या किंवा दिवे लावू नये.
– विजेच्या तारा, गॅस पाइपलाइन किंवा पार्किंगच्या ठिकाणी फटाके फोडू नये.
– इमारतीला रोषणाई करताना विद्युत तारांची जोडणी ओव्हरलोड करू नये. सैल जोडणी टाळावी.
कुरबुरी अन् कुरघोड्या! दोन्ही आघाड्यांतील खलबते संपेना, उमेदवारी अर्जासाठी आज शेवटचा दिवस, चित्र स्पष्ट होणार
अग्निशमन दलाकडून जनजागृती
मुंबईत दिवाळी साजरी करताना मोठ्या प्रमाणात फटाक्यांची आतषबाजी, दिव्यांची सजावट तसेच विद्युत रोषणाई मोठ्या प्रमाणात केली जाते. त्यामुळे उत्साहाच्या भरात आगीच्या दुर्घटनांना निमंत्रण देतो. त्यामुळे आगीच्या दुर्घटना वाढण्याची शक्यता नाकारता येत नाही. दिवाळीत सर्वात जास्त आगीच्या घटनांची शक्यता ही झोपडपट्टी, चाळी, वस्तींमध्ये अधिक असते. त्यामुळे या भागात आगीच्या घटना घडू नये, यासाठी दिवाळीत फटाके वाजवताना नेमकी कोणती काळजी घ्यावी, यासाठी मुंबई अग्निशमन दलाने मुंबईतील झोपडपट्टी, चाळींमध्ये जनजागृती मोहीम गेल्या वर्षी केली होती. मुंबईतील १६७ ठिकाणी जनजागृती मोहीम पार पडली होती. यंदाही ही मोहीम हाती घेताना विशेष करून झोपडपट्यांमध्ये जनजागृतीवर अधिक भर असणार आहे. आगीची घटना घडल्यास १०१ क्रमांकावर किंवा महापालिका हेल्पलाइन क्रमांक १९१६ वर कॉल करून त्वरित माहिती देण्याचेही आवाहन केले आहे.
पुण्यात ‘बंडोबां’नी वाढवली कॉंग्रेसची डोकेदुखी; कसबा पेठ, पर्वती, शिवाजीनगरमध्ये थोपटले दंड
आठ महिन्यांत ३ हजार आगी
गेल्या आठ महिन्यांत मुंबई अग्निशमन दलाकडे ३ हजार १९२ आगीच्या घटनांची नोंद झाली आहे. यामध्ये आठ जणांचा मृत्यू आणि ११३ जण जखमी झाले आहेत. जखमींमध्ये तीन जण अग्निशमन दलाचे जवानही आहेत. सदोष वायरिंग, निष्काळजीपणामुळे धूम्रपान करणे किंवा ती विझवताना पुरेपूर काळजी न घेणे, सिलिंडर स्फोट, स्टोव्हचा भडका इत्यादी आग लागण्यासाठी कारणीभूत ठरतात. पश्चिम उपनगरात सर्वाधिक आगीच्या घटनांची नोंद झाली