आबा चोख प्रत्युत्तर देण्यात पटाईत होते, आज ते असते तर… अजितदादांच्या आरोपावर रोहित पाटलांची प्रतिक्रिया

रोहित पाटील म्हणाले, अजितदादांनी मित्रपक्ष म्हणून आमच्यासोबत काम केलं होतं. आबांच्या पश्चात दादांचं नेतृत्वही आम्ही स्वीकारलं होतं. शरद पवारांनी आर आर आबांसाठी दिलेलं योगदान लक्षात घेता आम्हा सर्व कार्यकर्त्यांच्या म्हणण्यांनुसार पक्षफुटीनंतरही आबा असते तर ताकदीने शरद पवारांच्या पाठीशी उभे राहिले असते. आम्हीही शरद पवारांच्या मागे ताकदीने उभे राहण्याची भूमिका घेतली. आजचं दादांचं वक्तव्य मी ऐकलं पण आबा गेल्यानंतर ९ वर्षांनंतर हे त्यांनी बोलून दाखवलं आहे यामुळे माझ्यासह कुटंबीयांना दु:ख झालं आहे. त्यावेळेस काय निर्णय झालेले असतील आता आबा हयात नसताना आम्ही त्याची उत्तर देऊ शकत नाही.

‘आबा प्रामाणिकपणे काम करत होते. गृहमंत्री असताना त्यांनी सक्षमपणे आणि पारदर्शकपणे काम केलं आहे. अजित दादांच्या नेतृत्वामध्ये आम्हीही काम केलेलं आहे. दादांच्या वक्तव्यामुळे कुटुंबीयांसोबतच आबांच्या कार्यकर्त्यांनाही त्याचं दु:ख झालेलं आहे. त्यांनी पोलीस भरतीचा निर्णय, डान्स बार बंदीचा निर्णय, डान्स बार बंदीच्या वेळी तर त्यांना मोठ मोठ्या ऑफर आल्या होत्या. तरी त्यांनी हा मोठा निर्णय घेतला होता.

काय म्हणाले अजित पवार?

मला बदनाम करण्याचा प्रयत्न झाला. त्यावेळेस माझ्यावर ७० हजार कोटींचा खोटा आरोप करण्यात आला. अजितराव घोरपडे त्या खात्याचे मंत्री होते.
पगाराचा आणि सगळा खर्च ४२ हजार कोटीचा पण मी ७० हजार कोटीचा भ्रष्टाचार केला म्हणे. त्या भ्रष्टाचारांच्या आरोपाची फाईल तयार झाली आणि ती त्यावेळच्या गृहखात्याकडे गेली. त्या फाईलवर आर आर पाटलांनी अजित पवारांची खुली चौकशी करा अशी सही केली. हे केसाने गळा कापण्याचे धंदे आहेत. पृथ्वीराज बाबांचा पाठिंबा काढून घेतला आणि राष्ट्रपती राजवट लागली. त्यानंतर देवेंद्र फडणवीस मुख्यमंत्री झाल्यानंतर त्यांनी मला त्या फाईलवरील ती स्वाक्षरी दाखवली होती, असे वक्तव्य अजित पवारांनी केले आहे.

यासोबतच अजित पवारांनी आर आर पाटील यांच्याबद्दल आणखी एक गोष्ट सांगितली आहे. पवार भरसभेत म्हणाले की, मी कितीवेळा आर आर पाटीलला सांगायचो की, तंबाखू खाऊ नको. इस्लामपूरलाही मी सांगितलं होतं तरी त्याने ते सोडलं नाही. तरी माझ्यामागे गुपचूप चोळायचं आणि खायचं. नंतरच्या काळात बिचाऱ्याला आजार झाला. आम्हाला त्याने खोटं सांगितलं गाल सुजलाय, गालफुगी झाली. परंतु डॉक्टरांनी त्यांना सांगितलं काय झालंय ते, असेही अजित पवार म्हणाले.

यावर प्रतिक्रिया देताना रोहित पाटील पुढे म्हणाले, आबा असते तर चोखपणे प्रत्युत्तर दिलं असतं. ते अशाप्रकारच्या टीकांना प्रत्युत्तर देण्यात पटाईत होते. अजित दादांनी आता त्यावेळची एक आठवण सांगितली असेल पण त्याकडे मी टीका म्हणून बघत नाही.