भाजप अमित ठाकरेंचाच प्रचार करणार, सदा सरवणकरांची डोकेदुखी वाढणार; मुख्यमंत्री शिंदेंपुढे नवा पेच

शिंदेसेनेचे उमेदवार सदा सरवणकर यांनी आपला उमेदवारी अर्ज मागे घ्यावा आणि अमित ठाकरेंना पाठिंबा द्यावा, अशी महायुतीतील अनेक नेत्यांनी उघड भूमिका मांडली आहे. राज ठाकरेंनी लोकसभा निवडणुकीतील दिलेल्या पाठिंब्याची शिंदेसेनेने परतफेड करावी, असे आवाहन केले जात आहे. उपमुख्यमंत्री देवेंद्र फडणवीस यांनी देखील अमित ठाकरेंना पाठिंबा द्यावा, असे स्पष्ट केले. मात्र सदा सरवणकर कोणत्याही परिस्थितीत माघार घेण्यास तयार नाहीत. यातच आता भाजप आमदार प्रसाद लाड यांनी ‘आम्ही अमित ठाकरेंचाच प्रचार करणार,’ या विधानामुळे महायुतीतीत अंतर्गत वातावरण तापण्याची शक्यता आहे.

आमदार प्रसाद लाड म्हणाले, अमित ठाकरे आमचा मुलगा आहे. त्यामुळे आम्ही अमित ठाकरेंचा प्रचार करणार आहोत. अमित ठाकरेंना आम्ही निवडून आणणार. तसेच सदा सरवणकर ज्येष्ठ नेते आहेत. ते सध्या सिद्धिविनायक मंदिराचे अध्यक्ष आहेत. त्यांना राज्यमंत्री पदाचा दर्जा देखील देण्यात आला आहे. त्यामुळे मुख्यमंत्री शिंदे त्यांना विधानपरिषदेवर संधी देतील. त्यामुळे सदा सरवणकर उमेदवारी अर्ज माघार घेतील, अशी आम्हाला आशा आहे.

‘मुख्यमंत्री एकनाथ शिंदे सरवणकरांना समजवतील. मनसेने आम्हाला मदत केली आहे, त्यामुळे आम्ही मनसेलाच मदत करु. उद्या आम्ही चार वाजेपर्यंत वाट बघू,’ अशी भूमिका प्रसाद लाड यांनी मांडली आहे.

दरम्यान राज्यात दिवाळीनंतर प्रचाराचा बार उडणार आहे. त्यासाठी सर्वच पक्षांनी जोरदार तयारी सुरु केली आहे. यातच उमेदवारी अर्ज मागे घेण्याच्या शेवटच्या दिवशी माहिम विधानसभा मतदारसंघात कोणत्या घडामोडी घडणार हे पाहावे लागणार आहे.

सदा सरवणकरांनी ठेवली ‘ही’ अट
निवडणुकीतून माघार घेणार नाही, असे स्पष्ट भूमिका सदा सरवणकरांनी घेतली आहे. एकनाथ शिंदेंनी पुन्हा मुख्यमंत्री व्हावं, अशी सर्वसामान्य जनतेची इच्छा आहे.