ज्येष्ठ सारंगीवादक पद्मविभूषण पं. राम नारायण यांचं निधन, वयाच्या ९७ व्या वर्षी अखेरचा श्वास

भारतीय अभिजात संगीताला लोकप्रियता

पंडित राम नारायण यांची सारंगी यात्रा लहान वयातच सुरु झाली. त्यांच्या समर्पणामुळे ते आंतरराष्ट्रीय स्तरावरील प्रसिद्ध सारंगी वादक बनले. त्यांच्या सादरीकरणांनी जगभरातील प्रेक्षकांना मंत्रमुग्ध केले आणि त्यांनी जागतिक मंचांवर सारंगी आणि भारतीय अभिजात संगीताला लोकप्रिय करण्यात महत्त्वपूर्ण भूमिका बजावली. त्यांच्या दीर्घ कारकिर्दीत, त्यांना अनेक पुरस्कार मिळाले, ज्यात २००५ मध्ये भारताचा दुसरा सर्वोच्च नागरी सन्मान, पद्म विभूषण यांचाही समावेश आहे.

पुढच्या पिढ्यांनी वारसा चालवला

पंडित राम नारायण यांचा वारसा केवळ त्यांच्या असामान्य संगीत साधना व आविष्कार नव्हे तर गुरू म्हणूनही त्यांनी पुढील पिढीतील सारंगी वादकांना घडवले. यात त्यांची कन्या श्रीमती अरुणा नारायण-कल्ले, नातू हर्ष नारायण व प्रसिद्ध सरोद वादक ब्रिजनारायण तसेच अनेक शिष्यांचा समावेश होतो. तरल सूर, भक्ती आणि अविरत साधना, तंत्रशुद्धपणा यांनी ओथंबलेली पंडितजींची तेजस्वी सारंगी कारकीर्द ‘न भूतो न भविष्यति’. पंडित राम नारायण यांचे संगीत पुढील पिढ्यांतील संगीतप्रेमींना प्रेरित आणि प्रभावित करत राहील.

शिवाजी पार्क स्मशानभूमीवर अंत्यंसंस्कार

शासकीय सन्मानासह त्यांच्या पार्थिवावर दादर येथील शिवाजी पार्क स्मशानभूमीत शनिवारी दुपारी ४ वाजताच्या सुमारास अंत्य संस्कार होणार आहेत. त्याआधी त्यांचे पार्थिव शरीर शिवाजी पार्कजवळ अंतिम दर्शनासाठी दुपारी २ ते ४ वाजताच्या दरम्यान ठेवण्यात येईल.