काय उघडायचं ते उघडा, नंतर मी उघडतो तुम्हाला! ठाकरे संतापले, वणीत बॅग तपासणीवरुन तणातणी

वणीत सभेसाठी पोहोचलेल्या उद्धव ठाकरेंच्या बॅगांच्या तपासणीसाठी निवडणूक अधिकारी सरसावले. तेव्हा उद्धव यांनी त्यांना कधी मुख्यमंत्र्यांची बॅग तपासली का, असा सवाल केला. तुम्ही तुमचं काम करताय, ते बरोबर आहे. पण मोदी, शहा येतील, तेव्हा त्यांचीही बॅग तपासा. त्यांची बॅग तपासत असतानाचा व्हिडीओ माझ्याकडे आला पाहिजे, असं उद्धव ठाकरे म्हणाले.
Raj Thackeray: माझी पाचवी, शिंदेंची पहिलीच निवडणूक, सत्तेत आहात म्हणून ऑफर देणार का? राज ठाकरेंचा आवाज कठोर
वणीत नेमकं काय घडलं? ठाकरेंचा अधिकाऱ्याशी काय संवाद झाला?
ठाकरे- काय नाव तुमचं? कुठचे तुम्ही?
अधिकारी- माझं नाव अमोल घाटे. मी मूळचा अमरावतीचा.
ठाकरे- माझी तपासताय बरोबर आहे. माझ्या आधी कोणाची तपासली?
अधिकारी- पहिलाच दौरा तुमचाच आहे.
ठाकरे- हो हो. माझा दौरा पहिला आहे. पण माझ्या आधी कोणत्या राजकीय नेत्याची तपासली आहे?
अधिकारी- ४ महिने आलेत मला सेवेत येऊन
ठाकरे- ४ महिन्यात एकाचीही नाही तपासली? मीच पहिला गिऱ्हाईक सापडलो.
अधिकारी- नाही साहेब, असं काही नाही. तुमची बॅग..
ठाकरे- नाही माझी तपासा तुम्ही. मी तपासायला अडवत नाही. पण माझी एक बॅग तपासताना तुम्ही आतापर्यंत मिंध्याची तपासलीय का, देवेंद्र फडणवीसची तपासलीय का, अजित पवारची तपासली का? मोदींची तपासलीय का? अमित शहांची तपासली का?
अधिकारी- साहेब, अद्याप ते आले नाहीत.
ठाकरे- आले नाहीत नाही.. आले तर त्यांची बॅग तपासल्याचा व्हिडीओ मला पाठवायचा.
ठाकरे- हो साहेब नक्की साहेब. मोदींची बॅग तपासतानाच तुमचा व्हिडीओ आला पाहिजे. तिकडे तुम्ही शेपूट नाही घालायची. हा व्हिडीओ मी रिलीज करतोय. ठीक आहे. तपासा बॅग माझी. माझं युरिन पॉट पण तपासा.

यानंतर अधिकाऱ्यानं हेलिकॉप्टरमधील सामानाची तपासणी सुरु केली. एका बॅगमध्ये असलेली डबासदृश्य वस्तूही त्यांनी ठाकरेंसोबत असलेल्या व्यक्तीला उघडायला सांगितली. त्यावर ‘काय उघडायचं ते उघडा. नंतर मी उघडतो तुम्हाला’, असं ठाकरे तपासणी करणाऱ्या अधिकाऱ्याला म्हणाले. हे अधिकारी कोणत्या शासकीय नोकरीत आहेत बघून घ्या, अशी सूचना ठाकरेंनी त्यांच्यासोबत असलेल्या व्यक्तीला केली.