PM मोदी, अमित शहा, शिंदेंच्या बॅगा-हेलिकॉप्टर तपासा; उद्धव ठाकरेंच्या आरोपानंतर पाहा निवडणूक आयोगाने काय उत्तर दिले

उद्धव ठाकरेंनी केलेल्या आरोपांवर निवडणूक आयोगाकडून उत्तर आले आहे. महाराष्ट्र विधानसभा निवडणुकीत आधी लेव्हल प्लिइंग फील्ड निश्चित करण्यासाठी सर्व एसओपीचे पालन केले जाते. राजकीय नेत्यांच्या हेलिकॉप्टरच्या तपासणी संदर्भात आयोगकडून अधिकाऱ्यांना कडक नियमांचे पालन करण्यास सांगितले आहे. २०२४च्या लोकसभा निवडणुकी दरम्यान सत्ताधारी पक्षाच्या प्रमुख नेत्यांच्या हेलिकॉप्टरची तपासणी करण्यात आली होती. भाजपचे राष्ट्रीय अध्यक्ष जेपी नड्डा यांच्या हेलिकॉप्टरची २४ एप्रिल २०२४ रोजी बिहारच्या भागलपूर येथे तपासणी केली गेली होती. तर अमित शहा यांच्या हेलिकॉप्टरची २१ एप्रिल रोजी बिहारच्या कटिहार जिल्ह्यात तपासणी करण्यात आल्याचे आयोगाने सांगितले.

राज्यातील महाविकास आघाडी आणि महायुती यांच्यात निवडणूक प्रचारात जोरदार आरोप प्रत्यारोप सुरू आहेत. अशातच उद्धव ठाकरे यांनी यवतमाळ येथे निवडणूक अधिकाऱ्यांकडून बॅगांची तपासणी करत असलेला व्हिडिओ शेअर केला होता. त्यानंतर दुसऱ्या दिवशी देखील अशाच प्रकार झाला. यावर आदित्य ठाकरे यांनी एक्सवर या घटनेचा व्हिडिओ शेअर केला. आदित्य यांनी निवडणूक आयोगाला Entirely Compromised commission असे म्हटले. आयोगाकडून होणाऱ्या या तपासणीमुळे उद्धव ठाकरेंच्या सभांना उशीर करण्याचा प्रयत्न असल्याचा आरोप त्यांनी केला. त्याच बरोबर पीएम मोदी किंवा अन्य मंत्र्यांचा असा तपास का केला जात नाही, असा सवाल उपस्थित केले.

लातूर आणि सोलापूर येथे झालेल्या सभेत उद्धव ठाकरे म्हणाले, गेल्या वेळी मोदींच्या हेलिकॉप्टरची तपासणी करण्यात आली तेव्हा ओडिसामधील अधिकाऱ्याला निलंबित करण्यात आले होते. मला तपासणी करणाऱ्या अधिकाऱ्याबद्दल तक्रार नाही. पण अशा लोकांबद्दल आहे जे मुद्दम असे करत आहेत.