पुढच्या वेळी आमदार बनूनच या! अमित ठाकरेंकडे हट्ट, मनसे नेत्याच्या मुलीची पत्रातून मागणी

मनसे अध्यक्ष राज ठाकरे यांचे पुत्र अमित ठाकरे हे माहीम विधानसभा मतदारसंघातून निवडणूक लढवत आहेत. माहीममध्ये अमित ठाकरेंसमोर दुहेरी आव्हान आहे, एकीकडे शिवसेना शिंदे गटाचे उमेदवार सदा सरवणकर तर दुसरीकडे ठाकरे गटाचे उमेदवार महेश सावंत यांच्याविरोधात अमित ठाकरेंची लढाई आहे. ही आव्हानं पेलवताना प्रचारादरम्यान अमित ठाकरेंना मतदारांचं, कार्यकर्त्यांचं प्रेमही मिळतंय. अशाच एका मनसैनिकाच्या घरी भेट देताना एका चिमुकलीने अमित ठाकरेंकडे हट्ट केलाय. मनसे पदाधिकाऱ्याच्या मुलीने अमित ठाकरेंना ”अमित काका आमदार बनायचंच” अशा आशयाचे पत्र लिहिलंय. घरी आलेल्या अमित ठाकरेंना तिने हे पत्र सुपूर्द केलं आणि आपल्या मनातली इच्छाही सांगितली. उर्वशी लक्ष्मण पाटील असं या मुलीचं नाव असून अमित काका आमदार बनायचंच असं तिचं म्हणणंय.