अस्तित्त्व संकटात, ठाकरे मविआतून बाहेर पडणार? शेवटचा बालेकिल्ला राखण्यासाठी समोर ३ पर्याय

फेब्रुवारी २०२५ मध्ये मुंबई महापालिकेची निवडणूक होऊ शकते. विधानसभा निवडणुकीत सपाटून मार खाणाऱ्या शिवसेना उबाठाला आता महाविकास आघाडीत राहायचं की नाही, याचा निर्णय लवकरात लवकर घ्यावा लागेल. त्यांचा निर्णय दुधारी तलावारीसारखा असू शकतो. शिवसेना उबाठा स्वबळावर लढल्यास विरोधी मतांचं विभाजन होऊ शकतं. त्याचा थेट फायदा भाजप, शिवसेनेला होण्याची दाट शक्यता आहे. ठाकरेंनी काँग्रेस, राष्ट्रवादी शपसोबत राहण्याचा निर्णय कायम ठेवल्यास परंपरांगत मतदार त्यांच्यापासून दूर जाऊ शकतो. विधानसभा निवडणुकीत याचा ट्रेलर दिसलेला आहे. महापालिका हातून निसटल्यास उरलेसुरलेले शिवसैनिक आणि नेते शिंदेंकडे किंवा भाजपकडे जाऊ शकतात.

मुंबई महापालिकेची शेवटची निवडणूक २०१७ मध्ये झाली. त्यावेळी शिवसेना, भाजप स्वबळावर लढले. शिवसेनेनं ८४, तर भाजपनं ८२ जागा जिंकल्या. त्यावेळी दोन्ही पक्षांच्या नेत्यांनी एकमेकांनी विखारी टीका केली होती. २०१२ मध्ये केवळ ३१ जागा जिंकणाऱ्या भाजपनं २०१७ मध्ये थेट ८२ जागा खिशात घातल्या. महापालिकेत एकूण २२७ प्रभाग आहेत. सत्ता स्थापनेसाठी ११४ जादुई आकडा आहे. मुंबई महापालिकेवर १९९७ पासून सेना, भाजपची सत्ता आहे. २०१९ मध्ये युती तुटल्यानंतर पालिकेतील समीकरणं बदलली.

विधानसभा निवडणुकीत राज ठाकरेंच्या मनसेमुळे शिवसेना उबाठाची मोठी नाचक्की टळली. मुंबईत उबाठानं १० जागा जिंकल्या. तर भाजपनं १५, शिवसेनेनं ६ जागांवर बाजी मारली. उबाठानं मुंबईत जिंकलेल्या १० जागांपैकी निम्म्या जागांवर मनसेची भूमिका निर्णायक ठरली. मनसेच्या उमेदवारांनी घेतलेल्या मतांमुळे उबाठाचे उमेदवार जिंकले. याचा फटका शिवसेनेच्या उमेदवारांना बसला.

विधानसभा निवडणुकीत राज यांच्या मनसेचीही धूळधाण उडाली. राज यांच्या पक्षाला एकही जागा मिळाली नाही. मनसेला केवळ १.५५ टक्के मतदान झालं. तर शिवसेना उबाठाला ९.९६ टक्के मतं पडली. २०१२ च्या मुंबई महापालिका निवडणुकीत मनसेनं २८ जागा जिंकल्या होत्या. पण २०१७ मध्ये हाच आकडा थेट ७ वर आला.

मुंबई महापालिका आशियातील सगळ्यात श्रीमंत महापालिका आहे. पालिकेचा अर्थसंकल्प अनेक राज्यांच्या अर्थसंकल्पांपेक्षा मोठा आहे. त्यामुळे शिवसेना उबाठाला महापालिकेवरील सत्ता टिकवावी लागेल. यासाठी आता पक्षाकडे ३ पर्याय आहेत. आघाडीत राहून अधिकाधिक जागा लढवून विजय मिळवायचा पहिला पर्याय पक्षासमोर आहे. दुसरा पर्याय स्वबळावर लढण्याचा आहे. यात पराजयाचा धोका अधिक आहे. तिसरा पर्याय मनसे आणि अन्य पक्षांना सोबत लढण्याचा आहे. त्यासाठी उद्धवसेनेला मनसेशी युती करावी लागेल. सध्याच्या घडीला दोन्ही ठाकरे संकटात आहे. त्यांचं राजकारण धोक्यात आहे. त्यामुळे ठाकरे बंधू एकत्र येणार का याकडे लक्ष लागलं आहे.