वैशाली झनकर लाच प्रकरण ताजे असतानाच या घटनेमुळं नगरमधील शैक्षणिक वर्तुळात खळबळ

अहमदनगर: नाशिक जिल्हा परिषदेच्या शिक्षणाधिकारी वैशाली झनकर वीर (Vaishali Zankar Veer) यांनी आठ लाखांची लाच घेतल्याचे प्रकरण ताजे असतानाच नगर जिल्ह्यात अशीच एक घटना घडली आहे. बीएचएमएस अभ्यासक्रमाच्या एका विद्यार्थिनीला पदवी प्रमाणपत्र आणि इंटर्नशीप केल्याचे प्रमाणपत्र देण्यासाठी सुमारे दीड लाखांची लाच स्वीकारताना वैद्यकीय महाविद्यालयाचे प्राचार्य आणि लिपिकाला अटक करण्यात आली. वडाळा महादेव (ता. श्रीरामपूर) येथील शिवा ट्रस्ट संचलित शरदचंद्रजी पवार होमिओपॅथीक होमिओपॅथी मेडीकल कॉलेजमध्ये ही घटना घडली. प्रभारी प्राचार्य बापूसाहेब बाळासाहेब हरिश्चंद्रे व लिपिक भारती बापूसाहेब इथापे यांना अटक करण्यात आली आहे. (Shrirampur Medical College Bribe Case)

वाचा: फरार शिक्षणाधिकारी वैशाली झनकर यांची संपत्ती किती? धक्कादायक माहिती समोर

या प्रकरणी औरंगाबाद जिल्ह्यातील गांगापूरच्या एका विद्यार्थीनीच्या पालकांनी तक्रार दिली आहे. त्यावरून नगरच्या लाचलुचपत प्रतिबंधक पथकाने गुरुवारी दुपारी सापळा रचून ही कारवाई केली. गंगापूरच्या या विद्यार्थिनीने या वैद्यकीय महाविद्यालयात बीएचएमएसचे शिक्षण घेतले. तिचे उत्तीर्ण झाल्याचे प्रमाणपत्र, इंटर्नशीप पूर्ण केल्याचे प्रमाणपत्र देणे, या कालावधीतील गैरहजेरीची अडजेस्टमेंट करणे यासाठी लाच मागण्यात आली होती. एक लाख ४७ हजार ५०० रुपयांची लाच मागण्यात आली होती. लाचलुचपत प्रतिबंधक विभागाचे पोलीस निरीक्षक शाम पवरे यांनी पंचासमक्ष जाऊन पडताळणी केली. तेव्हा प्राचार्य हरिश्चंद्रे यांच्या सांगण्यावरून लिपिक इथापे यांनी लाचेची मागणी केली. पडताळणी झाल्यानंतर सापळा रचण्यात आला आणि आरोपींना पकडण्यात आले. प्रभारी प्रचार्य बापूसाहेब बाळासाहेब हरिश्चंद्रे (५२ रा. मानूर, ता-राहुरी) व लिपिक भारती बापूसाहेब इथापे (वय ३४ रा. वडाळा महादेव, ता. श्रीरामपूर) यांना पकडण्यात आले.

वाचा: आत्मनिर्भर ही नवी गोष्ट नाही, फक्त आता मार्केटिंग होतंय; सुप्रिया सुळे कडाडल्या

लाचलुचपत प्रतिबंधक विभागाचे उपअधीक्षक हरीष खेडकर यांच्या मार्गदर्शनाखाली पोलीस निरीक्षक दीपक करांडे, संतोष शिंदे, रमेश चौधरी, रविंद्र निमसे, वैभव पांढरे, बाबासाहेब कराड, महिला पोलीस अंमलदार संध्या म्हस्के, हारुन शेख, राहुल डोळसे यांच्या पथकाने ही कारवाई केली. श्रीरामपूर शहर पोलिस ठाण्यात गुन्हा दाखल करण्यात आला असून आरोपींना उद्या न्यायालयात हजर करण्यात येणार आहे.