तोतया पत्रकाराविरुद्ध पुण्यात खंडणीप्रकरणी गुन्हा दाखल

पुणे, ता. २६ : पुणे शहरातील लष्कर भागातील एका व्यावसायिकाकडे खंडणी मागणाऱ्या तोतया पत्रकाराविरुद्ध पोलिसांनी गुन्हा दाखल केला. सूरज पाटोळे (रा. रामटेकडी, हडपसर) असे गुन्हा दाखल केलेल्या तोतया पत्रकाराचे नाव आहे.

Thank you for reading this post, don’t forget to subscribe!

याबाबत राजेश जनार्दन श्रीगिरी (वय ५५) यांनी लष्कर पोलिस ठाण्यात फिर्याद दिली आहे.

श्रीगिरी यांचे लष्कर भागात कार्यालय आहे. पाटोळे श्रीगिरी यांच्या कार्यालयात गेला. एका वृत्तपत्रात पत्रकार असल्याचे सांगून त्याने व्यावसायिकाकडे खंडणी मागितली.

‘तुम्ही जुगार अड्डा चालवीत असून, दरमहा पाच हजार रुपये द्यावे लागतील. पैसे न दिल्यास बातमी प्रसिद्ध करू,’ अशी धमकी त्याने दिली. पाटोळेने पैसे देण्यासाठी तगादा लावून श्रीगिरी यांना धमकावले. श्रीगिरी यांनी पोलिसांकडे तक्रार दिल्यानंतर पोलिसांनी पाटोळेला सापळा लावून पकडले.