Tej Police Times
म. टा. प्रतिनिधी, पुणे: गणेशोत्सव सर्व जातिधर्मांना जोडून समाजाला एकसंध करतो, याचे उदाहरण मंगळवार पेठेतील शेख कुटुंबीयांनी समोर ठेवले आहे. ब्रिटिशांविरोधात सामाजिक एकोप्यासाठी लोकमान्य टिळकांनी गणेशोत्सवाला व्यापक स्वरूप दिले; सामाजिक एकोप्याची ही परंपरा शेख कुटुंबाने जपली आहे. या कुटुंबात वीस वर्षांपासून साजरा होणारा गणेशोत्सव आता या वस्तीचा झाला आहे.
‘मंगळवार पेठेतील भीमनगर भागात सर्व जातिधर्माचे लोक एकोप्याने राहतात. परिसरातील मंडळाचा भाऊ अध्यक्ष होता. धाकट्या मुलीच्या जन्मावेळी मी आजारी पडले. माझा जीव वाचण्याची शक्यता कमी असल्याचे डॉक्टरांनी घरातील व्यक्तींना सांगितले. मी आजारपणातून बरी झाल्यावर घरी तुझी प्राणप्रतिष्ठा करीन, ही माझी प्रार्थना गणपती बाप्पाने ऐकली. त्यानंतर मी आजारातून ठणठणीत बरी झाले. तेव्हापासून घरी गणेशोत्सव सुरू झाला. सुरुवातीला विरोध झाला; मात्र आम्ही आमच्या निर्णयावर ठाम राहिलो. गणेशोत्सव, दिवाळी, ईद अशा सर्व सणांना आजूबाजूचे लोक, नातेवाईक आवर्जून येतात,’ असे मुमताज यांनी सांगितले.
‘मुंबईत चौपाटीवर मूर्ती पाहून अस्वस्थ व्हायचो. पुण्यात परतल्यानंतर मातीच्या मूर्तीऐवजी चांदीच्या मूर्तीची प्रतिष्ठापना करण्याचा निर्णय घेतला. गणरायाची आम्ही रोज पूजा करतो. सर्वांनी एकोप्याने राहून एकमेकांच्या मदतीला धावून गेले पाहिजे,’ असे मोहम्मद सांगतात. दोन्ही मुलींनी उच्च शिक्षण पूर्ण करून त्यांचे आयुष्य घडवावे, अशी मुमताज यांची इच्छा आहे. शगुफ्ता आणि सुफिया दोघीही घरची परिस्थिती बदलण्यासाठी मोठ्या जिद्दीने शिक्षण पूर्ण करीत आहेत.
धाकट्या मुलीच्या जन्मावेळी मी आजारी पडले. माझा जीव वाचण्याची शक्यता कमी असल्याचे डॉक्टरांनी घरातील व्यक्तींना सांगितले. मी आजारपणातून बरी झाल्यावर घरी तुझी प्राणप्रतिष्ठा करीन अशी प्रार्थना गणपती बाप्पाला केली आणि ही प्रार्थना गणपती बाप्पाने ऐकली. तेव्हापासून घरी गणेशोत्सव सुरू झाला.
– मुमताज शेख