सुरेखा पुणेकर प्रविण दरेकरांवर संतापल्या, ‘त्या’ वादग्रस्त टीकेवर दिलं चोख प्रत्युत्तर

पुणे : लावणी सम्राज्ञी सुरेखा पुणेकर यांची आता लवकरच राजकारणात एन्ट्री होणार आहे. उद्या राष्ट्रवादी काँग्रेसमध्ये त्या प्रवेश करणार आहेत. पण या प्रवेशाच्या आधीच त्यांनी विरोधी पक्षांवर टीकेची झोड उठवली आहे. भाजप नेते आणि विरोधी पक्षनेते प्रविण दरेकर यांनी तीन दिवसांपूर्वी जाहीर सभेमध्ये सुरेखा पुणेकर यांचं नाव न घेता त्यांच्यावर टीका केली होती. यावरूनच सुरेखा पुणेकर यांनी दरेकर यांना चोख प्रत्युत्तर दिलं आहे.

‘राष्ट्रवादी काँग्रेस पक्ष हा रंगलेल्या गालांचे मुके घेणारा पक्ष’ असल्याची टीका दरेकर यांनी केली होती. यावर सुरेखा पुणेकर यांनी त्यांच्या खास शैलीत प्रविण दरेकर यांना प्रत्युत्तर दिलं आहे. भाजपसारख्या चांगल्या लोकांच्या पक्षात घाण तोंडाचे दरेकर कसे काय असा थेट प्रश्न त्यांनी उपस्थित केला आहे.

तब्बल ४५ तासानंतर यश, वर्धा नदीतील बोट दुर्घटना प्रकरणात आणखी ६ मृतदेह सापडले
खरंतर प्रविण दरेकर यांच्या या वादग्रस्त वक्तव्यावर राष्ट्रवादीकडून तुफान टीका करण्यात आली. राष्ट्रवादी काँग्रेसच्या महिला प्रदेशाध्यक्ष रूपाली चाकणकर यांनीदेखील कठोर शब्दात प्रविण दरेकर यांच्यावर टीका केली. तर आता सुरेखा पुणेकर यांनीही प्रविण दरेकर यांच्यावर घणाघात केला आहे.

‘दरेकरांबाबत मला खूप वाईट वाटतं. एवढे मोठे नेते आहेत पण त्यांना महिलांचा अपमान करण्याचा अधिकार कोणी दिला? मी भांड्यांची काम करून इथपर्यंत आले. आज मी महाराष्ट्राची कला परदेशात नेली. घराघरात मी लावणी करायला शिकवली, अशा महिलांचादेखील दरेकर यांनी अपमान केला. त्यामुळे पुढच्या दोन दिवसात दरेकर यांनी माफी मागावी अन्यथा याचे परिणाम वाईट होतील’ असा इशारा सुरेखा पुणेकर यांनी दिलेला आहे.

ओबीसी आरक्षणासाठी अध्यादेशाचा मार्ग; जिल्हा परिषद निवडणुकांच्या पार्श्वभूमीवर राज्य मंत्रिमंडळाचा निर्णय