राहुल गांधींची संपत्ती आहे तरी किती ? रहायला नाही स्वत:चे घर, कँम्ब्रिज यूनिवर्सिटीतून केले M.Phil

नवी दिल्ली: काँग्रेस नेते राहुल गांधी हे लोकसभेची निवडणूक उत्तरप्रदेशमधील रायबरेली येथून लढणार आहेत. शुक्रवारी त्यांनी आपला उमेदवारी अर्ज भरला व निवडणूक आयोगाला त्यांच्या जवळील संपत्तीची माहिती दिली. राहुल गांधी यांच्याकडे २० कोटींहून अधिक जंगम-स्थावर संपत्ती असल्याचे त्यांनी जाहीर केले आहे. ज्यात ४.२ लाख रुपयांच्या सोन्यांचा समावेश आहे. त्यांच्या परिपत्रकातून अशी माहिती समोर आली आहे की,राहुल गांधींकडे कोट्यावधींची संपत्ती असूनही कार तसेच रहायला स्वत:चे घर नाही.

राहुल गांधींकडे सध्या ९ कोटी २४ लाख ५९ हजार २६४ इतकी जंगम संपत्ती आहे. ज्यात ४ कोटी ३३ लाख ६० हजार ५१९ रुपयांचे शेअर, ३ कोटी ८१ लाख ३३ हजार ५७२ रुपयांचे म्युचल फंड, २६ लाख २५ हजार १५७ रुपये बँकेच्या खात्यात आणि १५ लाख २१ हजार ७४० रुपयांचे सुवर्ण रोखे यांचा समावेश आहे.

Lok Sabha 2024: प्रियांका गांधी खासदार होणार! रायबरेलीतून राहुल गांधींच्या उमेदवारीने समोर आला काँग्रेसचा प्लॅन बी
याचबरोबर, गांधींनी आपल्याकडे ११ कोटी १५ लाख २ हजार ५९८ इतकी स्थावर मालमत्ता असल्याची माहिती दिली आहे. ज्यात ९ कोटी ४ लाख ८९ हजार इतकी त्यांची स्वत:ची संपत्ती आहे व २ कोटी १० लाख १३ हजार ५९८ इतकी पूर्वजांकडून मिळालेली मालमत्ता आहे.

राहुल गांधींकडे नाही हक्काचे घर

राहुल गांधी यांनी आपल्याकडे ५५ हजार रोख रक्कम असल्याची माहिती दिली आहे. याचबरोबर त्यांच्याकडे ३३३.३ ग्रॉम सोने व दागिने आहेत. ज्यात १६८.८ ग्रॉम सोने असून ज्याची किंमत ४ लाख २० हजार ८५० इतकी आहे. गांधी यांनी त्यांच्याकडे कार तसेच इतर कोणतेही वाहन नाही तसेच घर ही नाही परंतु त्यांच्यावर ४९ लाख ७९ हजार १८४ रुपयांचे कर्ज आहे.

राहुल यांच्याकडे स्थावर मालमत्तेच्या रुपात दिल्ली येथील महरोली जवळील सुल्तानपुर गावात जवळपास ३.७७८ एकर जमीन आहे. त्यांची बहिण प्रियंका गांधी वाड्रा व त्यांच्यातील ही संयुक्त मालमत्ता आहे. याव्यतिरिक्त, गुरुग्राममधील सिग्नेचर टॉवर्स येथे ५,८३८ चौरस फुट व्यावसायिक कार्यालय आहे. ज्याची सध्याची किंमत जवळपास ९.०५ कोटी इतकी आहे.

Brij Bhushan Singh: विद्यमान खासदार बृजभूषण सिंह यांचे तिकीट कापले; भाजपचा कैसरगंजमधील नवा उमेदवार…
राहुल गांधी यांनी सांगितले की, सध्याचे उत्पन्नाचे स्त्रोत त्यांच्या खासदारकीमधून मिळणारा पगार, भाडे, बॉंडद्वारे मिळणारे व्याज आणि म्युचल फंड यांच्यातून मिळणारा फायदा हे आहे. राहुल यांनी वार्षिक वर्ष २०२२-२३ आणि २०२१-२२ या वर्षीसुद्धा आपल्या संपत्तीचा खुलासा केला होता. २०२२-२३ या वर्षी त्यांची एकूण संपत्ती १ कोटी २ लाख ७८ हजार ६८० रुपये तर २०२१-२२ या वर्षी ३१ लाख ४ हजार ९७० रुपये इतकी संपत्ती होती.

कँम्ब्रिज यूनिवर्सिटीतून केले M.Phil

निवडणूक आयोगाला दिलेल्या माहितीनुसार, राहुल गांधी यांना कँम्ब्रिज यूनिवर्सिटीच्या ट्रिनिटी कॉलेजमधून एमफिलची पदवी मिळाली आहे. याव्यतिरिक्त, त्यांनी फ्लोरिडा येथील रोलिंस कॉलेजमधून आर्ट्समध्ये पदवी मिळवली आहे. राहुल गांधींच्या विरोधात देशातील अनेक राज्यांत १८ गुन्हे दाखल आहेत.

मार्च २०२३ मध्ये राहुल गांधी यांच्यावर मोदी समाजाविरुद्ध केलेल्या अपमानजनक वक्तव्यामुळे त्यांना भारतीय दंड संहितेच्या कलम ४९९ आणि ५०० नुसार दोषी ठरविण्यात आले होते. ज्यात न्यायालयाने त्यांना २ वर्षाच्या कारावासाची शिक्षा दिली होती. ४ ऑगस्टला सर्वोच्च न्यायालयाद्वारे या शिक्षेवर स्थगिती देण्यात आली.