Bangladeshi MP Death Case: हत्येप्रकरणी खाटीक अटकेत; खासदाराच्या मृतदेहाचे तुकडे केल्याची दिली कबुली

वृत्तसंस्था, नवी दिल्ली : बांगलादेशचे खासदार अन्वरउल अझिम अनार यांच्या हत्येप्रकरणी पश्चिम बंगालच्या ‘सीआयडी’ने एकाला अटक केली आहे. मूळचा बांगलादेशातील हा आरोपी व्यवसायाने खाटीक असून, अनार यांच्या मृतदेहाचे तुकडे करण्यास अन्य आरोपींना मदत केल्याची कबुली त्याने दिल्याचे पोलिसांनी सांगितले.

‘अनार यांच्या हत्येच्या कटाचा भाग म्हणून या आरोपीला दोन महिन्यांपूर्वी कोलकाता येथे बोलावण्यात आले होते. भारतात बेकायदा प्रवेश केलेल्या या आरोपीने काही दिवस ओळख बदलून मुंबईतही वास्तव्य केले होते’, असे पोलिसांनी सांगितले. अनार यांची हत्या करणाऱ्या चार आरोपींना मदत केल्याची कबुली त्याने दिल्याचे पोलिसांनी स्पष्ट केले. या आरोपीला शुक्रवारी दुपारी न्यायालयात हजर केले असता, न्यायालयाने त्याला १२ दिवसांची सीआयडी कोठडी दिली. अनार यांच्या मृतदेहाच्या शोधासाठी सीआयडी पथकाने आरोपीला कृष्णामती गावातील भांगर तलावाजवळ नेले. तिथे अनार यांच्या मृतदेहाचा शोध सुरू होता.

Nashik : मी कालूचा भाचा नव्हे, PSI बोलतोय! जिल्हा रुग्णालयात तरुणाचा गोंधळ, घटनेनं पोलिस यंत्रणाही चक्रावली
अनार यांचा अमेरिकी मित्र अख्तरूझ्झामन याने हत्येसाठी पाच कोटी रुपयांची सुपारी दिल्याचे प्राथमिक तपासात उघड झाले आहे. व्यवसायाने खाटीक असलेला आरोपी या अमेरिकी नागरिकाच्या संपर्कात कसा आला, त्याचे साथीदार कोण आहेत, याबाबत चौकशी सुरू असल्याचे पोलिसांनी सांगितले. या प्रकरणात बांगलादेश पोलिसांनी अटक केलेल्या तीन आरोपींच्या चौकशीसाठी पश्चिम बंगाल सीआयडीच्या पथकाने गुरुवारी बांगलादेशला भेट दिली होती.

खासदार अनार हे वैद्यकीय उपचारासाठी १२ मे रोजी कोलकाता येथे आले होते. मात्र, ते बेपत्ता झाल्याची तक्रार, त्यांचे कोलकाता येथील परिचित गोपाळ विश्वास यांनी १८ मे रोजी पोलिसांत नोंदवली होती. त्यांची हत्या झाल्याचे तपासात निष्पन्न झाले.