बिल मंजूर न केल्याने कंत्राटदाराने संपवलं जीवन, सरकारी संस्थेसह कुटुंबीयांना ठरविले जबाबदार, काय घडलं?

वृत्तसंस्था, दावणगेरे (कर्नाटक) : कर्नाटक सरकारच्या संस्थेसाठी केलेल्या कामाची बिले मंजूर न केल्यामुळे एका कंत्राटदाराने आत्महत्या केली आहे. पी. एस. गौडर (४८) असे त्याचे नाव आहे.

काय आहे प्रकरण?

कंत्राटदाराने मृत्यूपूर्वी चिठ्ठी लिहिली आहे. त्यात कर्नाटक ग्रामीण पायाभूत सुविधा विकास लिमिटेड (केआरआयडीएल) आणि आपल्या भावासह कुटुंबातील इतर सदस्यांना मृत्यूसाठी जबाबदार ठरविले आहे. वडिलोपार्जित मालमत्तेच्या मुद्द्यावरून कुटुंबीयांमुळे मानसिक तणाव निर्माण होत असल्याचा आरोप त्यांनी केला. याशिवाय ‘केआरआयडीएल’ने चन्नागिरी तालुक्यातील सांतेबेन्नूर येथील कृषी विभागाच्या जागेवर दिलेल्या कामांची बिले मंजूर न केल्याने ते आर्थिक तणावात होते, असा आरोप कंत्राटदाराने चिठ्ठीमध्ये केला.

गौडर हे परवानाधारक ठेकेदार नसल्याचे पोलिस पडताळणीत समोर आले आहे. त्यांच्या ‘सुसाइड नोट’ आणि पत्नीच्या तक्रारीच्या आधारे कुटुंबातील सदस्य आणि ‘केआरआयडीएल’ यांच्यासह पाच जणांविरुद्ध गुन्हा दाखल करण्यात आला.

दरम्यान, याप्रकरणी वरिष्ठ अधिकाऱ्यांची समिती स्थापन करून आरोपांची चौकशी करून अहवाल सादर करण्याचे आदेश दिले असल्याचे ग्रामविकास आणि पंचायतराजमंत्री प्रियांक खर्गे यांनी सांगितले.