अॅमेझॉनवरून ‘एक्सबॉक्स’ कंट्रोलर बुक, पार्सल उघडताच धक्कादायक दृश्य; नेमकं काय घडलं?

वृत्तसंस्था, बेंगळुरू : अॅमेझॉनमधून आलेले पार्सल त्यांनी घेतले. ते उघडून पाहणार तोच त्यावर चक्क नाग दिसल्याने त्या जोडप्याची पाचावर धारण बसली. कोब्रा असल्याचा संशय असलेला हा साप पॅकेजिंगसाठी वापरण्यात आलेल्या चिकटविण्याच्या टेपमध्ये अडकला होता. बेंगळुरूमध्ये ही धक्कादायक घटना घडली आहे.हे जोडपे सर्जापूर येथे राहणारे आणि आयटी क्षेत्रात काम करणारे आहे. त्यांनी अॅमेझॉनवरून ‘एक्सबॉक्स’ कंट्रोलर मागवला होता. नाव उघड न करण्याच्या अटीवर त्यांनी या घटनेची माहिती दिली. त्यांनी तयार केलेला याबाबतचा व्हिडीओ व्हायरल झाला आहे. कंपनी या प्रकाराचा तपास करीत आहे, असे अॅमेझॉन इंडियाच्या प्रवक्त्याने सांगितले.
मोठी बातमी: १२ लाख लोकांसाठी रोजगार उपलब्ध, ७६ हजार २०० कोटी रुपयांचा खर्च ; वाढवण बंदराला हिरवा झेंडा

‘आम्ही सर्जापूर रोड येथे राहतो. डिलिव्हरी देणाऱ्याने हे पार्सल आमच्या हातात दिले. आम्ही हा संपूर्ण प्रकार कॅमेऱ्यावर चित्रीत केला आहे. शिवाय आमच्याकडे प्रत्यक्षदर्शी साक्षीदारही आहेत. तो एक कोब्रा होता आणि टेपला चिकटलेला होता. त्याने आमच्या घरातील किंवा अपार्टमेंटमधील कुणालाही ईजा केली नाही,’ असे या जोडप्याने म्हटले आहे. या पार्सलचे संपूर्ण पैसे आम्हाला परत मिळाले; परंतु साप घरात आल्याने आमच्या जीवाला धोका निर्माण झाला त्याचे काय? सुरक्षिततेसाठी घेण्यात येणाऱ्या खबरदारीच्या उपायांकडे हे दुर्लक्ष आहे. अॅमेझॉनची निष्काळजी, त्यांची खराब वाहतूक/ गोदामव्यवस्था, स्वच्छता आणि पर्यवेक्षणाचे हे उदाहरण असल्याचा आरोपही या जोडप्याने केला आहे.

‘आमच्या ग्राहकांची, कर्मचाऱ्यांची सुरक्षितता याला आमचे सर्वोच्च प्राधान्य आहे. आम्ही ग्राहकांकडून आलेल्या सर्व तक्रारी गांभीर्याने घेतो. या घटनेचा तपास करीत आहोत.
– अॅमेझॉन