घरात २ पंखे आणि ३ बल्ब… मजुराला ३१ लाखांचं बिल, पैसे न भरल्याने विजही कापली; कुटुंब हैराण

पाटणा : मागील काही दिवसांत अनेकांना भरमसाठ विजेची बिलं आल्याचा अनुभव आला असेल. मात्र वीज बिलाबाबत एक धक्कादायक प्रकरण समोर आलं असून त्या मजुरासह अनेकांनी हैराण करणाऱ्या प्रतिक्रिया दिल्या आहेत. वीज विभागाकडून एका मजुराला तब्बल ३१ लाख रुपयांचं वीज बिल पाठवण्यात आलं आहे. हे बिल दोन महिन्यांचं आहे. ३१ लाख रुपये विज बील येणाऱ्या मजुराच्या घरात केवळ दोन पंखे आणि तीन बल्बचा वापर केला जातो. मात्र या पाच विजेच्या उपकरणांचं त्याला ३१ लाख रुपये विज बील आल्याने कुटुंब चक्रावून गेलं आहे.

मिळालेल्या माहितीनुसार, शुभलाल सहनी हे मुजफ्फरपूर येथील राहणारे आहेत. शुभलाल मजुरी करुन आपल्या कुटुंबाचं पालन-पोषण करतात. घरात मोजकी पाच विजेची उपकरणं वापरणारे शुभलाल यांना ३१ लाखांचं वीज बिल आल्याने ते अतिशय चिंतेत असून सतत वीज विभागाकडे फेऱ्या मारत आहेत. इतकंच नाही तर ३१ लाखांचं वीज बिल भरलं नसल्याने त्यांच्या घरातील वीजदेखील कापण्यात आली आहे.
Yavatmal News : विदर्भात ४८ तासांत पाच शेतकरी आत्महत्या, कृषिदिनाच्या पूर्वसंध्येला धक्कादायक माहिती उघड

दोन महिन्यांपूर्वी लावलेलं स्मार्ट मीटर

मजुरी करणाऱ्या शुभलाल सहनी यांनी सांगितलं, की त्यांच्या घरच्या विजेच्या बिलाचं कनेक्शन त्यांची पत्नी फूला देवीच्या नावे आहे. दोन महिन्यांपूर्वी वीज विभागाकडून स्मार्ट मीटर लावण्यात आलं होतं. त्यानंतर काही दिवस घरी वीज होती. मात्र काही दिवसांपासून अचानक वीज कापण्यात आली. त्यानंतर २० जून रोजी ४०० रुपये रिचार्ज केला, तरीही घरात वीज आली नसल्याने वीज विभागात जात पदाधिकाऱ्यांना याबाबत सांगितलं. त्यानंतर त्यांच्यावर ३१ लाख रुपयांचं वीज बिल थकीत असल्याचं समोर आलं आहे.
Delhi News : विमानतळावर संशयास्पद हालचाली, पोलिसांना संशय आणि…वृद्धाचा वेष करुन कॅनडाला निघालेला तरुण, काय घडलं?
त्याआधी दोन महिने २६०० रुपये बिल आलं होतं. केवळ दोन पंखे आणि तीन बल्बचं बिल २६०० रुपये आल्यानंतरही त्याने ते भरलं होतं. २६०० रुपयांनंतर ३१ लाखांचं बील पाठवण्यात आलं, ते भरलं नसल्याने आता वीज कापण्यात आली आहे.

वीज विभागाने काय सांगितलं?

वीज विभागाच्या इलेक्ट्रिकल इंजिनिअरने दिलेल्या माहितीनुसार, वीज बिलाबाबत तक्रार मिळाली असल्याचं त्याने सांगितलं. तसंच ३१ लाखांचं बिल आलेल्या व्यक्तीकडून लेखी तक्रार मागवण्यात आली आहे. याप्रकरणाचा तपास सुरू आहे. तसंच रीडरचीही माहिती घेतली जात आहे. वीज बिलात कधी गोंधळ होतो, मात्र तपासानंतर हे ठिक केलं जाईल, असं सांगण्यात आलं आहे.