पुण्यात मुसळधार, खडकवासलातून विसर्ग, पुन्हा पूरस्थिती, प्रशासन अलर्ट मोडवर

पुणे: पुण्यात पावसाने जोर धरला असून हवामान विभागाकडून पावसाचा रेड अलर्ट जारी करण्यात आला आहे. खडकवासला पाणलोट क्षेत्रात मुसळधार पाऊस होत असल्याने पुन्हा एकदा धरणातून मोठ्या प्रमाणात पाण्याचा विसर्ग सोडण्यात येत आहे. गेल्याच आठवड्यात खडकवासला धरणातून मोठ्या प्रमाणात मुठा नदीत विसर्ग सोडल्याने परिसरात पूरस्थिती निर्माण झाली होती. अनेक भागात छातीपर्यंत पाणी भरलं होतं आणि नागरिकांना बोटीतून बाहेर काढावं लागलं होतं. आता पुन्हा अशीच परिस्थिती उद्भवताना दिसत आहे. त्यामुळे नागरिकांना सतर्क राहण्याच्या सूचना देण्यात आल्या आहेत, तर प्रशासनही अलर्ट मोडवर आहे.

मोठ्या प्रमाणात पाऊस होत असल्याने खडकवासला धरणाच्या सांडव्यावरुन मुठा नदीत २९४१४ क्यूसेक्सने सुरु असणारा विसर्ग हा ३५००२ क्यूसेक्स इतका करण्यात आला आहे. त्यामुळे पुन्हा पूरस्थिती उद्भवण्याची शक्यता आहे. त्या पार्श्वभूमीववर एकता नगर भागात लष्कर तैनात करण्यात आलं आहे.

मिळालेल्या माहितीनुसार, दुपारी १२ वाजता घेतलेल्या माहितीनुसार खडकवासला धरणातून सोडण्यात आलेल्या विसर्गामुळे सिंहगड रोड येथील एकता नगर, वारजे कर्वेनगर येथील निरंक, पुलाची वाडी, शांतीनगर झोपडपट्टी, इंद्रा नगर, चिमा गार्डन, दत्तवाडी, आदर्श नगर, बोपोडी या भागात पुराचं पाणी शिरलं आहे.
Pune Rain: पुणेकरांनो सावधान! पावसाचा रेड अलर्ट, खडकवालातून विसर्ग वाढवणार

• सिहंगड रस्ता येथे एकता नगरी याठिकाणी सनसिटी अग्निशमन केंद्र व पीएमआरडीए अग्निशमन वाहन तीन बोटींसह कार्यरत आहे.
• नवले अग्निशमन केंद्र येथील अग्निशमन वाहन निंबोज नगर येथे कार्यरत आहे.
• जनता अग्निशमन केंद्र येथील अग्निशमन वाहन दत्तवाडी घाट येथे कार्यरत आहे.
• कसबा अग्निशमन केंद्र येथील अग्निशमन वाहन नदीपाञ भिडे पुल येथे कार्यरत आहे.
• एरंडवणा अग्निशमन केंद्र येथील अग्निशमन वाहन नदीपाञ पुलाची वाडी येथे कार्यरत आहे.
• येरवडा अग्निशमन केंद्र अग्निशमन वाहन व पीएमआरडीए येथील रेस्क्यु व्हॅन विश्रांतवाडी याठिकाणी कार्यरत आहे.
• नायडू अग्निशमन केंद्र येथील अग्निशमन वाहन ताडीवाला रोड याठिकाणी कार्यरत आहे.

सद्यस्थितीत सर्व ठिकाणी परिस्थिती नियंञणात आहे. सध्या ३५००२ क्यूसेक्सने पाण्याचा विसर्ग सुरु असून आवश्यकतेनुसार बदल संभवू शकतो. तसेच, पावसाच्या प्रमाणानुसार व येव्यानूसार विसर्ग पुन्हा कमी/जास्त करण्याची शक्यता आहे याची नोंद घेण्यात यावी.

धरणातील पाणीसाठ्यात वाढ; अजित पवारांनी प्रशासनाला दिल्या सतर्कतेच्या सूचना

मागील काही दिवसात धरणक्षेत्रात मोठ्या प्रमाणात पाऊस होत आहे. त्यामुळे धरणांमधील पाणीसाठ्यात वाढ होत आहे. या पार्श्वभूमीवर उपमुख्यमंत्री अजित पवार यांनी प्रशासनाला सतर्क राहण्याच्या सूचना दिल्या आहेत. आज अजित पवार बारामती दौऱ्यावर आहेत. या दौऱ्यादरम्यान त्यांनी दूरध्वनीद्वारे संपर्क साधत प्रशासकीय अधिकाऱ्यांना सुचना दिल्या. पाण्याचा वाढता विसर्ग लक्षात घेवून नागरीकांकांना तशा सूचना द्याव्यात, तसेच नागरीकांना पाण्याच्या विसर्गाबद्दल माहिती व्हावी या अनुषंगाने विविध माध्यमातून माहिती देवून सतर्क राहण्याबाबत कळवण्याच्या सूचना यावेळी पवारांनी दिल्या.