फडणवीस-राज ठाकरेंच्या वाढत्या जवळीकीमुळे भाजपच्या ‘वोट बँक’वर परिणाम? व्हायरल फोटोमुळे चर्चांना उधाण

फडणवीसांचा राज ठाकरे यांच्यासोबतचा फोटो सोशल मीडियावर व्हायरल होत आहे. लोकसभा निवडणुकीत राज ठाकरे यांच्या मनसेसोबत युती करण्यासाठी भाजपने जोरदार प्रयत्न केले. यासाठी राज ठाकरेंसोबत दिल्लीमध्येही खलबतं झाली, तिथे राज ठाकरेंनी अमित शहा यांचीही भेट घेतली. पण ही युती उत्तर भारतीय, गुजराती, राजस्थानी आणि इतर राज्यांतील लोकांना पसंतीस पडली नाही.
Sada Sarvankar : ज्याचा एकही आमदार नाही, तो मुख्यमंत्री कोण होणार सांगतो, सरवणकरांचा टोला, म्हणतात मी नाही, ठाकरेंचा उमेदवारच माघार घेईल
ही परिस्थिती पाहता भाजपने एक पाऊल मागे घेतले आणि राज यांच्याशी युती करण्याचे प्रकरण थंड बस्त्यात ठेवले. मात्र, लोकसभा निवडणुकीत राज ठाकरेंनी मोदींना बिनशर्त पाठिंबा जाहीर केला. यानंतर भाजपने मात्र राज ठाकरेंसोबत युती केली नसल्याचे स्पष्ट केले होते. राज ठाकरेंच्या मनसेची भूमिका उत्तर भारतीय विरोधी असल्याचे आतापर्यंत बोलले जाते. मनसेच्या लोकांनी उत्तर भारतीयाला मारहाण केल्याच्या अनेक बातम्याही समोर आल्या आहेत. दुकाने किंवा कार्यालयाच्या दर्शनी भागात मराठी पाट्या लावण्यावरून मनसे आणि गुजराती आणि राजस्थानी यांच्यात अनेक वाद पेटले. या सर्व गोष्टी यंदाच्या निवडणुकीत चर्चेच्या केंद्रस्थानी आहे. राज ठाकरे आणि फडणवीस यांचा फोटो व्हायरल झाल्यानंतर आता युतीची चर्चा पुन्हा एकदा सुरु झाली आहे.

लोकसभा निवडणुकीच्या निकालानंतर भाजप पक्ष राज ठाकरेंपासून काहीसा दुरावल्याचे दिसले. त्यातच राज ठाकरेंनी विधासभेसाठी स्वबळाचा नारा दिला. तरीही पडद्यामागे भाजप आणि राज ठाकरे यांच्यात खलबतं सुरु असल्याचे समोर आले. चर्चेदरम्यान मनसेने १० जागांवर पाठिंबा मागितला असून त्यातच राजपुत्राच्या माहीम विधानसभेचाही समावेश आहे. राज ठाकरेंनी पाठिंब्याची मागणी केलेल्या या १० जागांवर शिंदेसेनेचे उमेदवार आहेत. शिंदेसेनेच्या काही उमेदवारांनी मुख्यमंत्री एकनाथ शिंदे यांना ही गोष्ट सांगितली असली तरी भाजपच्या प्रेशर पॉलिटिक्स पुढे शिंदे झुकायला तयार नाहीत. मात्र आता उपमुख्यमंत्री देवेंद्र फडणवीस आणि मुंबई भाजप अध्यक्ष आशिष शेलार हे ज्या प्रकारे मनसे अध्यक्षांना अधिक महत्त्व देत आहेत, त्यामुळे महायुतीचे नुकसान होण्याची शक्यता नाकारता येत नाही.