माझी पाचवी, शिंदेंची पहिलीच निवडणूक, सत्तेत आहात म्हणून ऑफर देणार का? राज ठाकरेंचा आवाज कठोर

‘तुम्ही (महायुती) उमेदवार देणार नसाल तर मी अमितला उभा करेन ही माझी अट नव्हतीच. मी अमितचं नाव जाहीर केलं होतं. तो जो एपिसोड घडला, तो सगळा वेगळा आहे. मनसेच्या नेत्यांची एक बैठक झाली. त्यात नेत्यांनी निवडणूक लढवावी असा विषय आला. त्यावेळी अमित म्हणाला, पक्षानं सांगितलं तर मी पण उभा राहीन. तो बोलून गेला. त्याच्या बातम्या झाल्या. मी त्याकडे फारसं लक्ष दिलं नाही,’ अशा शब्दांत राज यांनी घटनाक्रम उलगडून सांगितला.
Raj Thackeray: सत्तेत जाण्याचा फॉर्म्युला काय? किंग, किंगमेकरची चर्चा फालतू म्हणत राज ठाकरेंचं त्रोटक उत्तर
‘पक्षाच्या नेत्यांची माझ्यासोबत बैठक झाली. त्यात काही नेते म्हणाले, अमितला भांडूपमधून उभं करा. मग मी अमितशी याबद्दल बोललो. तू निवडणूक लढवण्याबद्दल गंभीर आहेस का अशी विचारणा केली. तर त्यानं उत्तर दिलं, तुम्ही ठरवाल तसं. तुमची इच्छा असेल तर मी निवडणूक लढेन. मग मी त्याला म्हटलं, दादर-माहीममधून उभा राहा. कारण तिथे तो लहानाचा मोठा झालाय. परिसर त्याच्या परिचयाचा आहे. त्यानं चौपाट्यांवर स्वच्छतेची कामंही केली आहेत. मग आम्ही त्याचं नाव पहिल्या यादीतून जाहीर केलं,’ असं राज ठाकरेंनी सांगितलं.

‘अमितचं नाव जाहीर केल्यानंतर बाकीच्या गोष्टी सुरु झाल्या. गेल्या निवडणुकीला आदित्यच्या वेळेला मी एक चांगला संकेत म्हणून आम्ही उमेदवार देणार नाही म्हणून सांगितलं. मी स्वत:हून ते जाहीर केलं होतं. मी काय कोणाशी फोनाफोनी केली नव्हती. त्या वरळीत आमची ३८-३९ हजार मतं आहेत. आम्ही तिकडे निवडणूक लढलो आहोत. पण घरातला मुलगा लढत असल्यानं आम्ही निवडणूक लढवली नाही. समोरच्यांकडून ते व्हायचं असतं. चांगले संकेत म्हणून करा, अन्यथा निवडणूक लढवा. पण मी येऊन विनंती करणार नाही की अमित उभा राहतोय. आता तुम्ही काय करताय? तुम्हाला वाटत असेल तर तुम्हा करा. नसेल वाटत करु नका. ही काही जबरदस्ती होऊ शकत नाही. मी काय त्यांच्या युतीतला घटकपक्ष नाही,’ अशा स्पष्ट शब्दांत राज यांनी त्यांची भूमिका मांडली.
Maharashtra Election: माहीम मोहीम फिस्कटली; पण राज, शिंदेची मोक्याच्या मतदारसंघात गट्टी; ठाकरेंचा शिलेदार अडचणीत?
‘मी त्यांना बिनशर्त पाठिंबा दिला होता, ही गोष्ट खरी असली तरी पण ते त्यांनी लक्षात ठेवायला हवं होतं, मी नाही,’ असं राज ठाकरे म्हणाले. आम्ही राज ठाकरेंना भांडूपची जागा ऑफर केली होती, असं मुख्यमंत्री एकनाथ शिंदे एका मुलाखतीत म्हणाले होते, याची आठवण राज यांना करुन देताच,
तुम्ही मला का ऑफर करताय? असा सवाल राज यांनी विचारला.

माझी पाचवी निवडणूक आहे. एकनाथ शिंदेंची पहिली निवडणूक आहे. स्वत:चा पक्ष म्हणून त्यांची पहिलीच निवडणूक आहे. तुम्ही आज सत्तेत बसला आहात म्हणून तुम्ही ऑफर करु शकत नाही, असं म्हणत असताना राज यांचा आवाज कठोर झाला होता. ‘तुम्हाला निवडणूक लढवायची असेल तर लढवा. काही संकेत असतात. मी त्यांच्याकडे काही मागायला गेलो नव्हतो, काही सांगायला गेलो नव्हतो. तो माझा स्वभाव नाही. माझे निर्णय अनेकदा अनेकांना चुकीचे वाटतात. पण माझे निर्णय काही नफ्यातोट्यातून घेतलेले नसतात,’ असं राज म्हणाले.