फिनले मिलच्या श्रेयावरुन जोरदार खडाजंगी, पालकमंत्री चंद्रकांत पाटलांसमक्ष राणा-कडू आमने-सामने

‘लाडकी बहीण’समितीतून डावलल्याने आमदार यशोमती ठाकूर संतप्त

राज्य सरकारच्या ‘मुख्यमंत्री माझी लाडकी बहीण’ योजनेच्या अंमलबजावणीसाठी तयार करण्यात आलेल्या समितीमधून आपणास डावलण्यात आल्याचा आरोप काँग्रेसच्या आमदार अॅड. यशोमती ठाकूर यांनी केला आहे. रविवारी जिल्हा नियोजन भवन येथे पार पडलेल्या जिल्हा नियोजन समितीच्या बैठकीत त्यांनी या मुद्द्यावरून सरकारवर जोरदार हल्ला चढविला. लाडकी बहीण योजनेतील लाभार्थी ठरविण्याच्या अनुषंगाने जिल्हाधिकारी सौरभ कटियार यांनी एक समिती गठीत केली आहे. समितीत काही अधिकारी व भाजपाचे कार्यकर्ते आहे. परंतु महिला आमदार असूनही आपल्याला डावलण्यात आल्याचा आरोप आमदार ठाकूर यांनी केला. ‘आम्ही तुमच्या लाडक्या बहीण नाही काय’, असा संतप्त सवालही त्यांनी केला. विशेष म्हणजे आमदार सुलभा खोडके त्या समितीवर असल्या तरी त्यांनीही आमदार यशोमती ठाकूर यांना समर्थन दिले. विरोधी पक्षाच्या आमदारांचा जिल्हा प्रशासन व शासनाकडून सातत्याने अपमान केल्या जात असल्याचेही ठाकूर यांनी सुनावले. संतप्त झालेल्या यशोमती ठाकूर यांची यावेळी पालकमंत्री चंद्रकांत पाटील यांच्यासोबतही शाब्दिक चकमक उडाली.
Mahayuti: मैत्रीदिनीच भिडले महायुतीतील मित्र; मुंबई-गोवा महामार्गावरुन शिवसेना-भाजपमध्ये आरोप-प्रत्यारोप

नियोजन अधिकाऱ्यांनी निधी अडविल्याचा आरोप

जिल्हा नियोजन अधिकारी अभिजित म्हस्के यांनी ५० कोटी रूपयांचा निधी अडवून ठेवल्याचा आरोप काँग्रेसच्या आमदार सुलभा खोडके यांनी बैठकीत बोलताना केला. तसेच म्हस्के यांच्या कार्यालयाद्वारे आर्थिक देवाणघेवाणही होत असल्याचा गंभीर आरोप करण्यात आला. जिल्हा नियोजन अधिकाऱ्याकडून निधीसाठी अडवणूक केल्या जात असल्याचा आरोप सर्वच आमदारांनी केला. त्यामुळे बैठक वादळी ठरली. म्हस्के यांचे निलंबन करण्यात यावे किंवा त्यांची जिल्ह्याबाहेर बदली करण्यात यावी, अशी मागणी आमदार यशोमती ठाकूर, आमदार देवेंद्र भुयार, आमदार बच्चू कडू यांनी केला. मात्र सदर निधी लोकसभा निवडणुकीच्या आचारसंहितेच्या काळात आल्याने तो वितरित करण्यासाठी विलंब झाल्याचे स्पष्टीकरण जिल्हाधिकारी सौरभ कटियार यांनी दिले. याशिवाय अंबानाल्याला सुरक्षा भिंतीसाठी निधी देण्याची मागणी आमदार सुलभा खोडके, जिल्हा नियोजन समिती सदस्य प्रशांत डवरे आदींनी केली.